پاکستان کے لیے قسمت سنوارنے کا موقع؟
یہ رپورٹ اس بنیادی نکتے کے گرد گھومتی ہے کہ 2026ء میں ایران اور امریکہ کے درمیان ہونے والی جنگ بندی کو محض ایک عارضی سفارتی پیشرفت سمجھنا ایک بڑی غلطی ہوگی۔ یہ دراصل عالمی نظام میں گہری تبدیلی کا اشارہ ہے، جس میں پرانا ’’یک قطبی‘‘ یعنی ایک سوپر پاور کے اثر و رسوخ کا نظام کمزور ہو رہا ہے اور ایک کثیر قطبی دنیا ابھر رہی ہے۔ اس تناظر میں پاکستان جیسے ممالک، جنہیں عموماً نظر انداز کیا جاتا ہے، اچانک غیر معمولی اہمیت اختیار کر سکتے ہیں۔ یہی وجہ ہے کہ یہ جنگ بندی ایک ’’آڈیشن‘‘ کا روپ اختیار کر گئی ہے۔ ایک ایسا مرحلہ جس میں درمیانی طاقتیں اپنی بین الاقوامی حیثیت کو بہتر کرنے کا موقع حاصل کر سکتی ہیں۔
اس تبدیلی کو سمجھنے کے لیے یہ رپورٹ ’’اسٹریٹجک پوزیشننگ‘‘ کا نظریہ پیش کرتی ہے، جس کے مطابق عالمی طاقتوں کی کشمکش کے دوران ایک مختصر مگر اہم موقع پیدا ہوتا ہے جس میں درمیانی طاقتیں اپنی حیثیت کو نمایاں طور پر بہتر بنا سکتی ہیں۔ پاکستان کے لیے یہ وہی لمحہ ہو سکتا ہے۔
پاکستان کے جغرافیائی محلِ وقوع کی اہمیت
پاکستان کی اہمیت اس کی روایتی طاقت کی وجہ سے نہیں ہے، بلکہ اس کے جغرافیائی محلِ وقوع، جوہری صلاحیت، اور سفارتی امکانات کے حوالے سے ہے۔ خاص طور پر گوادر سے آبنائے ہرمز تک تقریباً 1600 کلومیٹر کا فاصلہ اسے عالمی توانائی کے بہاؤ کے قریب ایک بہت اہم جغرافیائی حیثیت دیتا ہے۔
فوجی اور سیاسی قیادت کی ہم آہنگی
رپورٹ کے مطابق جنگ بندی کے عمل میں پاکستان نے ایک خاموش مگر مؤثر سفارتی کردار ادا کیا ہے، جو اس بات کی علامت ہے کہ اسلام آباد اور راولپنڈی (سیاسی اور فوجی قیادت) گزشتہ برسوں میں پس پردہ کچھ نئی حکمت عملی تشکیل دے رہے تھے۔
بیرونی انحصار اور معاشی دباؤ کے سائے میں خارجہ پالیسی
ماضی میں پاکستان کی خارجہ پالیسی کا سب سے بڑا مسئلہ اس کا مسلسل بیرونی انحصار رہا ہے:
- امریکہ پر سیکیورٹی کے لیے،
- آئی ایم ایف پر معاشی استحکام کے لیے،
- اور خلیجی ممالک پر روزگار کے مواقع کے لیے۔
اس انحصار نے پاکستان کی خودمختاری کو محدود رکھا اور اسے ایک ایسا ملک بنا دیا جو بڑے فیصلوں میں آزادانہ موقف اختیار نہیں کر سکتا تھا۔ تاہم اب ایک نئی سوچ ابھرتی نظر آ رہی ہے، جسے ’’ملٹی ویکٹر‘‘ حکمتِ عملی کہا جا سکتا ہے۔ اس کا مطلب ہے کہ پاکستان بیک وقت مختلف عالمی طاقتوں کے ساتھ تعلقات رکھے، کسی ایک پر انحصار نہ کرے، اور اپنی افادیت اس طرح بڑھائے کہ کوئی بھی طاقت اسے نظر انداز نہ کر سکے۔ یہ حکمتِ عملی سرد جنگ کے دوران بعض دیگر ممالک کی پالیسیوں سے مشابہت رکھتی ہے، جیسا کہ بھارت، مگر پاکستان کے لیے یہ ایک بڑی تبدیلی ہو گی۔
تاہم سب سے بڑی رکاوٹ پاکستان کی معاشی کمزوری ہے۔ ملک کے زرمبادلہ کے ذخائر انتہائی محدود ہیں، جو صرف چند ہفتوں کی درآمدات کے لیے کافی ہیں، جبکہ مہنگائی اور توانائی کا بحران معیشت کو مسلسل دباؤ میں رکھے ہوئے ہیں۔ آئی ایم ایف کے پروگرام نے وقتی ریلیف تو دیا ہے، مگر اس نے انحصار کے مسئلے کو ختم نہیں کیا۔ توانائی کی کمی خاص طور پر ایک بڑا مسئلہ ہے، جو صنعتی پیداوار کو کم کر کے مجموعی معیشت کو نقصان پہنچا رہی ہے۔
توانائی کے شعبے میں ایران کے ساتھ تعلقات پر پابندی
یہی وہ مقام ہے جہاں ایران کے ساتھ تعلقات اہم ہو جاتے ہیں۔ ایران-پاکستان گیس پائپ لائن، جو طویل عرصے سے پابندیوں کی وجہ سے تعطل کا شکار تھی، اب دوبارہ ممکن دکھائی دیتی ہے۔ اگر جنگ بندی کے بعد ایک ایسا سفارتی ماحول بنتا ہے جس میں پاکستان پابندیوں کے خوف کے بغیر ایران کے ساتھ توانائی کے شعبے میں تعاون کا سلسلہ قائم کر سکے، تو یہ اس کی معیشت کے لیے ایک فیصلہ کن تبدیلی ہو سکتی ہے۔
ایشیا کی سطح پر نئی سیاسی صف بندی
علاقائی سطح پر بھی ایک نئی صف بندی ابھر رہی ہے۔ چین، روس، ایران اور وسطی ایشیائی ممالک کے ساتھ تعلقات کو ایک نئے فریم ورک میں دیکھا جا رہا ہے، خاص طور پر ’’شنگھائی تعاون تنظیم‘‘ کے ذریعے۔ اس تنظیم میں ایران کی زیادہ فعال شمولیت اور انفراسٹرکچر ڈویلپمنٹ کے حوالے سے چین کے کردار نے اسے پہلے سے زیادہ اہم بنا دیا ہے۔ پاکستان اس پورے نظام کے جغرافیائی مرکز میں واقع ہے جو اسے ایک قدرتی ایک اہم کردار بنا دیتا ہے۔
ایک اور اہم پہلو پاکستان کی جوہری صلاحیت ہے۔ اگرچہ اسے عالمی سطح پر مکمل طور پر تسلیم نہیں کیا گیا، لیکن اسے نظر انداز بھی نہیں کیا جا سکتا۔ نئی کثیر قطبی دنیا میں یہ صلاحیت پاکستان کے لیے ایک اہم تزویراتی اثاثہ (اسٹریٹجک ایسٹ) بن سکتی ہے، خاص طور پر اس وقت جب عالمی سیکیورٹی کے روایتی ضامن کمزور پڑ رہے ہیں۔
نئی عالمی شناخت کے حصول کے امکانات
تاہم رپورٹ یہ بھی واضح کرتی ہے کہ یہ موقع یقینی کامیابی کی ضمانت نہیں ہے۔ پاکستان کو اندرونی سیاسی عدمِ استحکام، فوجی و سویلین قیادت کے درمیان ہم آہنگی کی کمی، بیرونی معاشی انحصار، اور علاقائی کشیدگی جیسے مسائل کا سامنا ہے۔ اسی لیے اندازہ لگایا گیا ہے کہ پاکستان کے اس موقع سے مکمل فائدہ اٹھانے کے امکانات صرف 25 سے 30 فیصد ہیں۔ مزید یہ کہ دیگر ممالک جیسے ترکی، سعودی عرب، حتیٰ کہ بنگلہ دیش بھی اسی خلا کو پُر کرنے کی کوشش کر رہے ہیں۔
رپورٹ کا انسانی پہلو بھی اہم ہے۔ پاکستان کی اکثریت نوجوانوں پر مشتمل ہے، جو ایک غیر یقینی مستقبل کے ساتھ جی رہے ہیں۔ ان کے لیے یہ سوال محض جیوپولیٹکس کے حوالے سے نہیں ہے بلکہ اپنی زندگیوں کے مستقبل کے بارے میں ہے: کیا ملک میں رہنا فائدہ مند ہوگا یا بیرون ملک جانا بہتر ہے؟
رپورٹ کے آخر میں تاریخی حوالے سے بتایا گیا ہے کہ کس طرح کچھ ممالک نے بحران کے لمحوں کو استعمال کر کے اپنی تقدیر بدل دی۔ پاکستان کے پاس بھی ایسا موقع موجود ہے، مگر اس کا انحصار اس بات پر ہے کہ اس کی قیادت کتنی بصیرت، ہم آہنگی اور مستقل مزاجی کے ساتھ اس موقع کو عملی شکل دیتی ہے۔ رپورٹ کا اختتام اسی خیال پر ہوتا ہے کہ پاکستان نے اپنی صلاحیت کا مظاہرہ تو کر دیا ہے، مگر اصل امتحان ابھی باقی ہے: کیا یہ موقع ایک حقیقی تبدیلی میں بدل سکے گا یا ماضی کی طرح ضائع ہو جائے گا۔
